آبلات زمان وابلات اليوم!!!!!

يالله علي ابلات زمان اللي كانو يفهموا صح ويقروا صح وكنا نروحو من المدرسه حافظين دروسنا
وكانت الابلة زي أمي الثانيه وكانت في الفصل طيح اليبره تسمعيها وزمان كان تخطم الابلة في الشارع واحني نلعبو ماتلقوش غير غبرتنا وكنا محترمينها وهي قدوتنا ..!!!
الله يالله يامحلا ايام زمان وابلات زمان.
لكن توا خلوني ساكت تعالو شوفوا الابلات القليل نادر تلقي الصغيويره محترمينها تلقي الابلة متبعه الموضه والمكياج ومعاش قدوه للطلبه يروحوا الطلبه تنشدهم شن أخيدتوا جديد يقولولك شنو لبسه الابله وشنو مكياجها وهاده كان جت للمدرسه مازيها حد تلقيها ياغياب وياتأخير وكان جت تلقيها معكسده برى مع الابلات التانين وطايحين قرمة فى العباد وملخيا طالب والا طابة على الفصل على اساس باش يستدب الامن فى ارجاء الفصل وكان تواضعت وجت اعطت حصتها تلقوها قالبه وجهها ومتكنطيه وكان قاللها طالب عاودى يولى وجها ازرق اتقول صب عليها مية مسقعا وفى الاخير ايروحو اللطلبة من المدرسة وهما ايهزو فى روسهم مش عارفين شنو الدرس اللى خدوه اليوم وربى يهدى.

(((طبعا مع احترامي لبعض الابلات)))

وهذااللى صاير مع اصغاركم وخوتكم .


تحياتى دبل زيرو

السلام عليكم ورحمة الله وبركاته :
تى باهى يا دبل .... تى خيرنا أبلات توا والله حاجه صح ..
وكانت الابلة زي أمي الثانيه لانها كانت كبيرة هلباا أما حنى توا صغيرات
و أما تلقي الابلة متبعه الموضه والمكياج فالأناقه ضرورية مش زي ابلات زمان تلقاها تقول باكو ألوان تشبحلها تحسها حاجة خطأ ..
وأما وهاده كان جت للمدرسه مازيها حد تلقيها ياغياب وياتأخير وكان جت تلقيها معكسده برى مع الابلات التانين وطايحين قرمة فى العباد هدى بالعكس ابلات زمان أكتر غياب وأكتر قرمة أما ابلات توا حتى لما يهدرزوا يهدرزوا عالستايل وعالتلفزيون مش قرمة ....
وأما تلقوها قالبه وجهها ومتكنطيه بالعكس تلقاها خاشه بابتسامة عريضة ليش لانها قاريه مسح حلو عالصبح ههههههههه ...
وكان قاللها طالب عاودى يولى وجها ازرق بالعكس نعاودوا مليون مرة ومش دروس المقرر بس حتى دروس السنوات اللي فاتو بس افهمووا ومع هذا لو معاودتش مش منها من المنهج الطويل اللي لازم تكمله وهيا جايه في نص السنه ونص السنه التانى يا عطل يا أمتحانات نصفيه ومش عارفه شنو .. وخاصة ان زمن الحصه أقل من زمن الحصه زمان ..والمنهج أطول من منهج زمان والسنه أقصر لانه زمان نظام سنه ...
وفى الاخير ايروحو اللطلبة من المدرسة وهما ايهزو فى روسهم مش عارفين شنو الدرس اللى خدوه اليوم فهذا مش لان الابله ما فهمتش لكن لأن الطالب وقت الحصه دماغه في حاجات تانيه واحد في النت زيك دبل ههههههه وواحد في الكورة وواحد في طيور الجنه وووو.....الخ.. تى شنو تحسابهم زينا حنى طلبه زمان ...